يقول جدي..

يقول#جدي
ثلاث عدياني:عيني و وذني و لساني كون ماجوش هوما نروح لقبري هاني.
ثلاث يطولوا العمر:الدار الواسعة و الفرس السريعة و المراة المطيعة.
ثلاثة يعمروا الدار:الحرث بالغبار و الفحول الصغار و الزواج ببنت الكبار.
ثلاثة خسارة:البني فالدار الصغيرة و الحرث فأرض حجيرة و الغلض فالمرأة القصيرة.
ثلاثة يقللو الصحة:الزواج بالمراة المعفونة و مشيان الحفا و هزان الذري على القفا.
ثلاثة يربحو: النعجة و العويجة والنحل ايلا جا ( العويجة تعني السنبلة).
الثلاثة من الجنون: الرايح للسوق بلا مال،والرايح للبير بلا حبال،و الجالس وسط الجماعة و ما دارش البال.
#عيب النفس في كثرة الخطايا و عيب النفس من قلة النوم و عيب العقل في موت الخلايا وعيب القلب دسان الهموم و عيب الروح في خبث النوايا.
الرجال يبانوا فالشدة وجه البارود إذا خرج ما فيه ردة و الرجال ماش فالزندة والعظم عمرو ما يكون فالكبدة والجايح يخلع بالهدرة و الدنيا فانية كيفها كيف الرقدة...
#جدي #قال
ما يفوح بخور بلا جمر وما ينبت زرع بلا مطر وما دوم محبة بلا قدر لمرا لحرا تجيب لحر وراجل ما يتبعش الذر .

طيح وشوف شكون يوقف معاك غيب وشوف شكون يسال عليك .... بعد غربل وصفي الرجال بالرجال ورجال بالله ضحكت لحباب بمال الدنيا وماتبدلهاش

لاديت من لجيال عبرة
ولا ديت من ليام والو
ولا مشيت لا تصد على الجرة
ولا تبع الفحل على مالو
ولا تصاحب لي عشرتو مرة
ولا تربح راحتك من هبالو
صاحب الراجل ولد الفحل والحرة
يجي نهار وتسال على حوالوا
لكلام كبير ولمعنى بحر...
..#جدي #قال
كي تبدا قول بسم الله كي تكمل قول الحمد لله .ما تتعراش وأنت عرقان , وما تشربش الماء وأنت عرقان وما تكسلش رجليك وسط جماعة , وما توكلش أولادك وسط جماعة , وما تشربش بالواقفة , وجهك نقيه ما تدري وش تلاقي بيه , ولي فاتك بالزين فوتو بالتبسيمة , ولي فاتك باللبسة فوتو بالنظافة , ولي فاتك بالعلم فوتو بالظرافة , ولي فاتك بالصنعة فوتو بالسياسة , ولي فاتك بالمال فوتو بالقناعة , ولد السبع ما يجي مشحاح , والدفلة ما تجيب تفاح..

..#قال جدي
يجي الوقت الخاوة يتعاركو كي لحناش و المطر يصب و الارض ما ترواش و الطُبة تعالج و الناس ما تبراش ، الحكم للرعيان و الراي للنسوان ، يكثرو فيه الحجاج و تجارة الدجاج و النسا بلا زواج ، الهدرة في الخيوط و الما في الحيوط ، اهلو ياكلو بالارطال و يشربو في الاسطال و ينامو الليل و ما طال ، شوف ذاك الزمان المكشوف الحمير ترعى و الخيل تشوف.مطركم عجاج وكسيبتكم الجاج ، خبزكم يخبزو الخباز ،النسا مشمرة والرجال مدمرة..